مردان میں پیکا ایکٹ کے تحت پہلا مقدمہ درج
مردان: مردان میں پریس کلب اور اس کے اراکین کے خلاف سوشل میڈیا پر منفی پروپیگنڈا پھیلانے کے الزام میں پیکا ایکٹ کے تحت پہلا مقدمہ درج کر لیا گیا۔ یہ مقدمہ تھانہ سٹی میں پریس کلب کے صدر اور جنرل سیکرٹری کی مدعیت میں درج کیا گیا جن کا کہنا ہے کہ زاہد نامی شہری سوشل میڈیا پر ان کے خلاف نازیبا زبان استعمال کر رہا تھا۔
تفصیلات کے مطابق زاہد کئی سالوں سے مختلف سوشل میڈیا اکاؤنٹس کے ذریعے مردان پریس کلب اور اس کے معزز اراکین کے خلاف منفی مہم چلا رہا تھا۔ اس حوالے سے پریس کلب کے صدر اور جنرل سیکرٹری نے ڈی پی او مردان ظہور بابر آفریدی کو تحریری درخواست پیش کی جس میں الزامات کے شواہد بھی فراہم کیے گئے۔
ڈی پی او مردان نے معاملے کا نوٹس لیتے ہوئے ایس پی سٹی شفیع الرحمن کو قانونی کارروائی کے احکامات جاری کیے جس پر ایس ایچ او سٹی عبدالسلام خان نے پیکا ایکٹ کی دفعات کے تحت مقدمہ درج کر لیا۔
یہ ضلع مردان میں پیکا ایکٹ کے تحت پریس کلب کی جانب سے درج ہونے والا پہلا مقدمہ ہے اور پولیس نے مزید تفتیش کا آغاز کر دیا ہے۔
